Kupfriedstutz

Glygge, Gugge, Schnitzelbangg,
Waage, Chaise - Eych e Dangg,
denn z Basel am mim  Rhy,
do sin mer gäärn derbyy.

Mache drey Daag Fasnacht zämme,
dien in de Gasse ummehängge,
Ainewääg maint jeede ÄR syyg s Bescht,
vo däm grosse Stroossefescht.

D Glygge wänn e Monopool,
Fyyre sich - sin ganz Frivool.
Es setti nur uns gää, saage sii,
dr Räschte isch halt au derbyy.

Jetzt het e Kinschtler - witzig und fräch,
gfunde, daas Joor hänn iir bäch.
Gold fir d Waggis das isch toll,
Silber isch fir s Guggewool,
und uff dr Kupferige isch,
e glatti Glygge freelig und frisch.

Denn kaufe miir halt numme Kupfer!
Fir s Comiteé isch daas e Naasestupfer.
Miir saage eych: Mit däm Verhalte,
duet me dr Gaischt vo dr Fasnacht spalte.
Denn dää wo Kupfrigi nid eert,
Däm blibt halt Gold und Silber verweert.

Drum dänggend draa, s bruucht alli z Basel,
und das isch kai saudumm Gschwaafel.
Das isch d Ainzigaartigkait am Ryy,
e Jeede isch zurächt derbyy.